Giza Eskubideen VIII. Zinemaldia

Apirilaren 23tik 30era

Giza Eskubideen VIII. Zinemaldiaren kartelean basamortu-ingurune batean jarritako kanila bat irudikatzen da. Bada, irudiak talka egiten du gure hirian Donostia Kultura Hiria: Bake eta Balioen Kultura dela Europari eta mundu osoari erakutsiz harrotzen ari diren «Herritarren energia-olatu»ekin. Kemen horri esker, 2016an Kulturaren Europako Hirietako bat izateko egoera onenean gaude.

Beste urte batez, Donostiako Udaleko Giza Eskubideen Arloak eta Donostia Kulturak giza energia horren kemena eta zinemaren (irudiaren mintzaira unibertsalaren eta hitzaren indarraren) sentsibilizazio-inpaktu eta -ahalmena lotu ditugu gure egunerokotasuna gidatzen duen helbururantz, hil ala biziko premia baitugu: giza eskubideak defendatu eta sustatzea, sektore ahul eta babesgabeenena bereziki.

Giza Eskubideen Zinemaldia zortzigarren aldiz da egitekoa, eta bere zinema- eta giza kalitatea gainditu du, baita jarduera paraleloei dagokienez ere: protagonistekin, film-zuzendariekin eta landutako gizarte-arloko gaietan adituak diren pertsonekin izandako solasaldiak, erakusketak, nazioarteko laburmetraia-lehiaketaren epaimahai gaztea, ikastetxeentzako goizeko zinema-saioak, sari berriak,… Guztiak ere gako bakar bat duela: gizateriaren erronka eta gabezia handiei buruzko ikuspegi kritiko, solidario, aldarrikatzaile eta plurala eskaini eta eragitea, bereziki mundua krisian murgilduta dagoen honetan.

Zinemaldiak maila altuko programazio bat biltzen du, nazioarteko eskalako estreinaldiak eta aurrestreinaldiak bilduz, aitortza eta sari ugariren bermedun mundu osoko herrialdeetako filmak dituela. Zinemaldia, gaztea izan arren, bost kontinenteetako giza eskubideen zinemaldi ugarientzako erreferentzia bihurtu da. Ildo horretan, Donostiako Giza Eskubideen Zinemaldiak urrats bat eman du bere nazioarteko ospean, bakarra baita Espainiako Estatuan Human Rights Film Network Giza Eskubideen Zinemaldien Nazioarteko Sarean parte hartzen; sare horretan, mundu osoko giza eskubideen zinemaldi nabarmenenak biltzen dira. Sare-lan berri horrek, zalantzarik gabe, indar eta borondate berriak elkartzeko balioko digu.

ODÓN ELORZA GONZÁLEZ
Donostiako Alkatea